Како последица од коронавирус на 59-годишна возраст почина фотографот и дипломат на МНР Драган Тодоровски. Тодоровски од 1996 година беше вработен во Министерството за надворешни работи (МНР) како официјален фотограф, кој во периодот до 2010 е хроничар на најзначајните надворешно-политички активности на македонската држава. Последната деценија работеше во Директоратот за билатерални односи со европските држави и беше одговорен за земјите од Северна Европа. Во периодот од 2015 до 2018, престојуваше во дипломатска мисија во Кралството Норвешка, извршувајќи ја функцијата вршител на должност во амбасадата Македонија во Осло.
Тодоровски беше еден од многуте заразени од коронавирусот во МНР, кои или беа болни или во моментов се заразени од оваа болест изминативе три недели. Неофицијално три спрата од зградата на МНР се речиси испразнети, а сепак тоа е една од ретките институции во која редовно се одржуваат средби и прес-конференции во живо, бидејќи министерот Бујар Османи одамна ја прележа болеста. Дипломатите се уплашени, поради што Мaкедонскиот дипломатски синдикат неодамна побара помош од колегите во Србија да се организира имунизација за нив, бидејќи во Македонија не се на листата на приоритетни.
„И покрај забележително големиот број отсуства како резултат на изолација на вработените поради контакти или заразеност со коронавирусот, Македонскиот дипломатски синдикат, за жал, во континуитет не е информиран од страна на раководството за здравствените состојби, како што исто така не е информиран и за сите други теми што имаат импликации во социјалната, економската и работната сфера во нашата институција, што инаку е негова легална обврска”, порачаа тогаш од овој синдикат.