Ули Хенес (64) ќе се врати на претседателската функција во Баерн Минхен по завршување на затворската казна.
Веста ја објавија германските медиуми, а потврда доаѓа и од клубот од „Алианц арена“ чиј советодавен тим ја поддржа неговата кандидатура.
Изборот е закажан за 25 ноември на кој Хенес ќе биде единствен кандидат. Карл Хефнер кој во моментот е прв човек на Баварците нема да аплицира за нов мандат.
Хенес ја загуби позицијата во Баерн М. поради затајување на три ипол милиони евра данок преку банкарски сметки во Швајцарија. Делото го призна и не се жалеше на одлуката на судот во Минхен.
Во февруари оваа година беше пуштен на слобода по издржување на една година и осум месеци од казната. Максималната казна за ваков вид на престап, според германските медиуми, е десет години, Обвинителството побара пет ипол години, на крајот беа пресудени три ипол години.
Условно санкционирање не доаѓаше во предвид. Таквата одлука не е задоволителна за затајување на данок за суми поголеми од еден милион евра.