Брисел овој пат е сериозно загрижен за стабилноста на Македонија но ЕУ не може без помош на партиите да ја врати Македонија на демократскиот пат бидејќи земјата не е протекторат. Од лидерите на политичките партии Брисел очекува одговорност и враќање на преговарачката маса а помош за да се седнe на маса треба да даде Делегацијата на Европската комисија во Скопје.
Ова е суштината на европската позиција за Македонија по вчерашната одлука на претседателот Иванов за аболиција. Претставниците на ЕК во Македонија очекуваат објаснување од Иванов и уверени се дека шефот на државата одлуката ја донел сам.
Во меѓувреме комесарот Хан е во Стразбург каде што одржа итна средба со тројцата европски пратеници – Ховит, Кукан и Вајгл. Средба на која ја анализирале новонастанатата состојба во Македонија.
Делегацијата на ЕК во Скопје добила задача да открие што стои зад одлуката на Иванов, дали тој ја донел сам и без консултации со другите партии како што тој самиот изјави.
Тројцата пратеници сметаат дека одлуката на Иванов го поткопува владеењето на правото и е голем и дополнителен ризик за стабилноста на земјата.
Според извори во ЕК, забрзано се бара начин за да се вратат лидерите на преговори а тројцата пратеници се подготвени во секое време да дојдат во Македонија и да помогнат. Засега таква најава нема од комесарот Хан.
Портпаролката на комесарот Јоханес Хан денес изјави:
“Комесарот ги повика сите партии да се вратат на преговарачката маса и да продолжат со реформите. Договорот создаде пат кој сите треба да го следат и мора да има примена на сето што беше преговорано и договорено од сите. Важно е сите партии да работат заедно”, рече Маја Коцијанчиќ.
Таа инсистираше дека Делегацијата на ЕК е многу активна, многу присутна и многу ангажирана и во Скопје и во Брисел. “Се трудиме да ги поддржиме сите напори како договорот од Пржино. Но ние не можеме се да направиме сами. Затоа велам дека е тоа е пред се одговорност на лидерите на политичките партии и тоа е во интерес на граѓаните”.
Таа потсети на вчерашната изјава од ЕК во која се вели дека Македонија се обврза на промовирање на владеење на правото и борба против неказнивоста. Спротивно на ова, одлуката на претседателот Иванов за амнестија на бројни функционери предизвикува сериозна загриженост. Таа се случува во време кога сите партии треба да бараат начин за заштита на Договорот од Пржино, се вели во реакцијата од Европската унија.
– Ги повикуваме сите страни да избегнат постапки кои ги доведуваат во ризик и ги поткопуваат повеќегодишните напори во земјата и со поддршка од меѓународната заедница да го зајакнат владеењето на правото, се вели натаму во реакцијата.
Воедно се истакнува дека е „важно да се поддржи работата на Специјалната обвинителка и нејзиниот тим избрани од Парламентот како дел од Договорот од Пржино, да продолжат со истрага на сериозните прашања што беа покренати минатата година.
Од еднаква важност е да се подготват кредибилни избори и да се одржи земјата на евроатлантскиот пат. А за таа цел партиите мораат да продолжат со дијалог.