Програмата на 13. издание на OFF-Fest е распоредена во пет богати фестивалски вечери, во кои ќе настапат состави од Етиопија, Португалија, Шпанија, Конго, Јужна Кореја, Унгарија, Словенија, Хрватска и Македонија, а ќе биде прикажан и еден музички документарец.
Годинешното издание на OFF-Fest, што ќе се одржи од 30.мај до 5.јуни во Скопје, а ќе стартува со настап на големиот унгарски композитор, импровизатор и виртуоз на виолината Феликс Лајко во тандем со неговиот колега и постојан соработник Антал Браснио.
На 1.јуни скопските музички зависници ќе имаат прилика првпат да ја почувствуваат во живо музиката на Етиопија, претставена од таткото на етио-џезот, легендарниот Мулату Астатке, а истата вечер ќе настапи и најжешкиот македонски лајв бенд Фолтин, со неколку специјални гости-музичари од странство: Васко Атанасовски и Марјан Станич од Словенија и Наталио Суед од Холандија.
Мулату Астатке
Проектот е резултат на соработката на три сродни интернационални музички фестивали: Druga Godba (Словенија), Music Meeting (Холандија) и OFF-Fest.
Музиката на Конго, највозбудливата африканска сцена во моментов, ќе биде претставена на 3 јуни преку харизматичниот Јупитер и неговиот бенд Оквес Интернеш’нел.
Јупитер и Оквес Интернеш’нел
Претпоследната вечер на OFF-Fest на 4 јуни, e резервирана за популарниот словенечки пејач и кант-автор Зоран Предин, придружен од хрватскиот џипси-свинг состав Дамир Кукурузович Џанго Груп, како и за јужнокореански инструменталисти и модерни традиционалисти Џемунго Фактори.
Зоран Предин и Дамир Кукурузович
OFF-Fest 2014 ќе финишира на 5 јуни, со настап на најголемата нова ѕвезда на португалското фадо Кармињо, како и со концертот на свежата фламенко атракција од Шпанија, инспиративниот женски квартет Лас Мигас.
Во рамките на OFF-Fest, ќе биде прикажан и документарниот филм „Танцот на Јупитер“,фасцинантна приказна за животот на музичарите во Конго раскажана преку едно неверојатно патување низ гетата на Киншаса.
Фестивалот годинава ќе се одвива на повеќе локации: Универзална сала, Салон на Македонската опера и балет, Кино Фросина и клубот „Станица 26“.