Close Menu

Охридската болница „Свети Еразмо„ се поднови со апарат за Магнетна Резонанца, пациентите нема веќе да патуваат во Битола, Скопје и Штип

0
By on ПОЛИТИКА
Во болницата „Св. Еразмо“ се третираат сите итни случаи на локомоторниот апарат од југозападниот регион, како и елективна хирургија од областа на ортопедија и неврохиргија од целата држава, додека од соседните држави, најмногу пациенти имаме од Албанија и од Косово, вели во интервјуто за НоваТВ прим. д-р Ацо Велески, директор на ЈЗУ Специјализирана болница за ортопедија и трауматологија „Св. Еразмо“ – Охрид.

ЈЗУ Специјализирана болница за ортопедија и трауматологија „Св. Еразмо“ – Охрид има традиција повеќе од 70 години и со гордост можам да кажам дека ги третира сите болести и состојби од областа на ортопедија, трауматологија на локомоторниот апарат, неврохирургија и медицинска рехабилитација. А вчера во болницата пристигна и апаратот за Магнетна Резонанца од 1,5 Т (Тесла), што е од огромно значење за пациентите од регионот и пошироко, коишто за оваа дијагностичка метода патуваа во Битола, Скопје или Штип и на закажаните термини чекаа по неколку недели или месеци, вели во интервјуто за НоваТВ прим. д-р Ацо Велески, директор на ЈЗУ Специјализирана болница за ортопедија и трауматологија „Св. Еразмо“ – Охрид.

Тој додава дека овој апарат е во фаза на монтажа и за три до четири недели ќе биде пуштен во функција, а дека поставувањето на МРИ во оваа јавна здравствена установа е од огромно значење за лекарите за навремено поставување и уточнување на дијагнозите, како и за натамошен навремен и соодветен третман на пациентите. 
 Со кои апарати досега ги дијагностициравте состојбите кај пациентите?

– Досега на располагање во дијагностичките процедури, освен класичниот рентген апарат, имаме ултразвук и апарат за Компјутерска томографија.

Колку операции, прегледи и рехабилитации се извршуваат годишно во оваа болница?

– Годишно во ЈЗУ „Св. Еразмо“ до појавата на ковид-19 пандемијата, во просек се извршуваа 1.700 хируршки интервенции и околу 55.000 амбулантски прегледи. Од почетокот на пандемијата бројот на хируршки интервенции е намален и во  2020 година се извршени околу 1.000 хируршки интервенции и околу 35.000  амбулантски прегледи.

Колкаво население од Македонија и од поширокиот регион покривате со здравствени услуги? Од која соседна земја има најмногу пациенти? 
– Во болницата „Св. Еразмо“ се третираат сите итни случаи на локомоторниот апарат од југозападниот регион, како и елективна хирургија од областа на ортопедија и неврохиргија од целата држава, додека од соседните држави, најмногу пациенти имаме од Албанија и од Косово.
Колку се чека на преглед и интервенција во оваа установа, за оние кои не се итни? Поради ковид-19 пандемијата сигурно е намалена оперативната програма?

– Како што и претходно напоменав, бројот на хируршки интервенции и амбулантски прегледи е во извесна мера намален поради почитување на ковид-19 протоколите. Цело време функционира системот „Мој Термин“ за пациентите кои не се итни, додека итните случаи се третираат промптно. За елективните операции, најчесто за ендопротетика на колк и колено, времето на чекање е во просек до 3 месеци.

Д-р Велески, кои операции се Ваша специјалност како хирург-ортопед ?

– Како специјалист-ортопед ги извршувам сите оперативни интервенции од областа на траума на локомоторниот апарат, освен ‘рбетен столб и карлица. Од областа на ортопедијата, ендопротетика на колк и колена и артроскопија на колено и зглоб.

Колку лекари, медицински сестри, болничари и друг персонал во болницата се грижат за здравјето на пациентите ?

– Болницата располага со 27 лекари специјалисти од кои: 11 ортопеди, 4 анестезиолози, 2 неврохирурзи, 2 рентгенолози, 3 физијатри, 2 невролози, 1 хирург за пластична и реконструктивна хирургија. Во установата се вработени и 1 биохемичар, 1 педијатар, како и 68 медицински сестри и 34 болничари и административен персонал.

Д-р Велески, претпоставувам дека сигурно има и некои пациенти коишто биле примени како безнадежни случаи, а сте го кренале на нозе? 

– Секојдневно се среќаваме со такви случаи, третираме итни случаи од сообраќајни незгоди и падови од висина. Вистинско задоволство е кога таквите пациенти по третманот во нашата установа ќе ги видиме со насмевка на своето лице и повторно на нога, подготвени за понатамошно секојдневно нормално функционирање.

(Љ.Б.)

Share.