Инвеститори сакаат да градат зграда на едно земјиште кое во исто време е во сопственост на државата, но и на приватни сопственици. На истото тоа земјиште веќе има зграда во која со децении живеат трети луѓе. Ова звучи како кратко сценарио на некој американски филм во кој главните протагонисти се борат со државата и со капиталистите, но сепак е само македонски апсурд за кој се информирани малкумина. Станарите кои веќе живеат во изградената зграда се обратија до нашата редакција, раскажувајќи ни ја нивната правна голгота која се уште нема разврска.
Населбата на излезот од Охрид кон плажите, популарно е наречена Карпош 5, бидејќи мнозинството од становите во тие згради се во сопственост на скопјани, кои ги користат единствено преку лето.
Во кратки црти, пред да се изградат зградите, на тоа место имало бавчи кои припаѓале на приватни лица, кои со одлука на тогашното југословенско раководство биле експроприрани, за што тие добиле соодветен материјален надоместок.
Откако на тоа место веќе биле изградени и вселени згради, едно од семејствата чие земјиште било експропирано, во 1997 година решило да ја тужи државата за да добие дополнителен надоместок, бидејќи сметале дека првично за време на Југославија не добиле доволно.
Судскиот спор траел со години, и додека се уште не била донесена Пресуда, семејството во 2003 година поднело барање до Министерството за транспорт и врски да им ја врати парцелата, што веднаш и се остварило – тие ја добиле парцелата назад во своја сопственост иако на тоа место веќе има изградено зграда во која живеат сопственици на становите.
Во меѓувреме, во 2015 година, Судот им ја уважува Тужбата и им пресудува обештетување за истата таа парцела во износ од околу 60 илјади евра, со што државата повторно го откупува земјиштето каде се изградени зградите.
Белинда Андоновска која има стан во една од зградите вели дека сето ова се случувало позади грбот на станарите.
– Ние мислевме дека со тоа што сме купиле станови кои се изградение за време на Југославија, сме направиле паметен и сигурен избор – резигнирано вели Андоновска.
Правната голгота на станарите кои имаат купено станови во зградите на ова спорно земјиште, ги одвела до портите на Државното правобранителство, Владата, Министерството за транспорт и врски, кои ја предлагаат истата правна поука, а таа е Општина Охрид да го прогласи за ништовно Решението со кое парцелата им се вратила во сопственост на семејството од кое била експроприрана во време на Југославија.
– Имајќи предвид дека во членот 112 став 1 од Законот за градежно земјиште меѓу другото е определено дека сите правосилно завршени предмети по кои се преземени вонредни правни лекови и се води повторена постапка ќе се преземат од страна на општините, општините во Градот Скопје и Градот Скопје со денот на исполнувањето на условите за вршењето на работите на располагањето со градежното земјиште во сопственост на РМ согласно со овој закон, а Општина Охрид ги има исполнето условите за вршење на работите на располагање со градежно земјиште во сопственост на Република Македонија и се има стекнато со правото на располагање со градежно земјиште во сопственост на Република Македонија, Општина Охрид има надлежност да постапува по вонредни правни лекови, односно да постапува по барања за поништување на решенијата за трансформација на правото на користење на градежно земјиште сопственост на РМ во право на сопственост по основ на поранешна сопственост донесени од Министерството за транспорт и врски – подрачно одделение Охрид – пишува во Мислењето на кое лично е потпишан премиерот Зоран Заев во октомври минатата година.
Градоначалникот на Охрид вели дека сочувствува со станарите и со сите луѓе кои се засегнати со проблемот, меѓутоа според него тие не реагирале на време кога се носел планот за градење.
– Нивната иницијатива е одбиена од Управен суд и јас сега како градоначалник немам никакви методи да инвеститор кој платил комуналии го спречувам во градба, појаснува Георгиески.
Додека институциите се самопрогласуваат за ненадлежни и си ја подаваат одговорноста едни на други, граѓаните од оваа населба велат дека нема да се откажат од тоа да ја добијат правдата и ќе продолжат упорно да се борат за логична разврска на овој случај од институциите.