Фестивалот „Охридско лето“, како најголема и најзначајна музичко-сценска манифестација во Македонија, изминатите денови беше презентиран пред Генерално собрание на Европската фестивалска асоцијација (ЕФА) што заседаваше во чешкиот град Острава.
Претседателот на УО на „Охридско лето“, Зоран Вељаноски Летра, престојот во Острава го искористи да оствари средби со претседателот на ЕФА Дарко Брлек, како и со претставници на останатите европски фестивали-членки на Асоцијацијата, на кои им врачи и официјални покани да бидат гости на претстојното 55-то јубилејно издание на „Охридско лето“.
– Во рамките на ЕФА работилниците стана збор и за фестивалите и културната соработка во Европа како и за спонзорства и комуникации во рамки на успешно реализирање на фестивали.На двете работилници имав кратко излагање за Фестивалот Охридско лето и го пренесов нашето искуство во оваа тематика, изјави Вељаноски.
Тој истакна дека програмата на годинешното фестивалско издание, што изобилува со звучни имиња од светската музичка и сценска уметност, предизвикале воодушевување кај првите луѓе на ЕФА.
– Навистина беа изненадени од она што го имаме на фестивалската сцена оваа година, посебно од концертот за свеченото отворање, изведбата на едно од најмаркантните музички дела на дваесеттиот век, – сценската кантата „Кармина бурана“ од германскиот композитор Карл Орф. Воодушевени беа од тоа што овој грандиозен мултимедијален проект се реализира од страна на продукциската куќа „Ла Фура Делс Баус“, кој го оценуваат како најголем спектакл во моментов во Европа, вели Летра.
На годинешново Генерално собрание на ЕФА учествуваа 123 делегати од триесетина земји во светот. Следната година овој голем собир на најзначајните културни здруженија ќе се одржи во Вроцлав, Полска, европски град на културата за 2016 година.
Првиот човек на УО на „Охридско лето“ присуствуваше на најголемиот настан во Острава – Фестивалот „Јаначек Мај“ што исто така оваа година одбележува голем јубилеј – 40 години постоење.