Францускиот претседател Франсоа Оланд и германската канцеларка Ангела Меркел постигнаа договор околу организација на економското управување на Европската унија, истакнувајќи ја потребата за претседател на Еврогрупата со полно работно време кој би имал поголеми овластувања.
„Се сложивме дека е потребно почесто одржување на самит на евро зоната со кој ќе се занимава претседателот на Еврогрупата со полно работно време кој би имал поголеми овластувања“, рече Оланд на заедничката конференција за новинари со Меркел.
„Европа е во стагнација на економски план, но таа излезе од економската криза“, оцени францускиот претседател.
Германската канцеларка повикала на поголема соработка во Европа.
Оланд, меѓу другото, истакнал дека Франција ќе ги почитува препораките на Европската комисија, но дека начините на кои реформите ќе бидат спроведено се во надлежност на Франција.
Европската комисија од Париз побара да спроведе структурни реформи, пред се’ во поглед на пензискиот систем, давајќи краен рок до 2015 година, за намалување на јавниот дефицит на три отсто од бруто домашниот производ.