Францускиот претседател Франсоа Оланд во петокот навечер во Варшава постигнал договор со полскиот премиер Доналд Туск за привремените работници, откако на самитот во Вилнус ја продолжил својата офанзива на шармирање на истокот од Европа, но дал и остри изјави на сметка на Украина.
Франција смета дека европската директива која треба да ги подобри условите за работ ана работниците кои се на привремена работа во некои од европските земји е недоволна, оценувајќи дека не ги спречува измамите и злоупотребите.
Париз презема чекори за зајакнување на своето законодавство и изгледа дека европските министри за труд веќе постигнале договор и го заостриле текстот за следната седмица.
-Разговаравме, а нашите министри за труд (францускиот Мишел Сапен и полскиот Анджеј Косиниак-Камиж) редовно контактираат за да се договорат за спроведувањето на таа директива и да ги спречат измамите и злоупотребите, изјави Оланд на заедничката прес-конференција со Туск.
Францускиот претседател сакал за таа тема да разговара со полскиот колега, без да потсетува на случајот на ткн „полски водоинсталатер” кој во 2005 година ги затегна односите меѓу двете земји.
За Оланд таа тема е значајна бидејќи крајната десница Националниот фронт ја постави како свој приоритет пред одржувањето на европските избори кои се распишани за мај следната година, а веќе на делумни предвремени избори убедливо ги победи социјалистите на Оланд и го зголемува својот рејтинг меѓу француските избирачи.
И полскиот премиер Доналд Туск изрази подготвеност за изнаоѓање заеднички став, истакнувајќи дека „нашите две земји испраќаат голем број работници во странство”. Но оцени и дека е „важно да се нема предрасуди” во врска со тоа.