Министерот за внатрешни работи, Оливер Спасовски утрово до СДСМ доставил писмена оставка на функцијата потпретседател на партијата.
Со овој потег, се подгреваат коментарите дека Спасовски ќе си оди и од извршната власт зашто засега нема информација дали тој ќе биде дел и од реконструираниот владин кабинет.
Пред неколку дена, во дебатниот магазин „Click Plus“ на ТВ21, Спасовски посочи дека не треба да биде дел од новиот тим на СДСМ, односно дека новиот претседател на партијата, Димитар Ковачевски треба да избере нови лица.
– На новиот претседател треба да му се даде можноста како што ја превзема одговорноста да биде лидер на партијата, да му се даде полно право во изборот на неговиот тим. Тој избор треба да го направи од нови луѓе, и затоа сметам дека не треба да бидам дел од новиот тим, се со цел да не го обременуваме ниту претседателот ниту новиот тим“, изјави тогаш Спасовски.