Граѓани од Албанија, Македонија, Италија и од Соединетите Американски држави се најчестите потписници на петицијата против уништувањето на хемиското оружје од Сирија во соседна Албанија, во очи донесувањето на одлуката на официјална Тирана.
Ова е линкот до петицијата, на која досега свој потпис ставиле над 35.000 граѓани, чиј број постојано се зголемува.
Албанскиот премиер Еди Рама попладнево треба да ја соопшти одлуката на Владата за американското барање – сириското оружје да биде уништено во таа земја.
На својот профил на Фејсбук албанскиот премиер Еди Рама напиша: „Денеска во 17 часот јавно ќе го претстават својот став по прашањето на хемиското оружје“. Тој додава дека се‘ уште не донесол никаква одлука по тоа прашање.
Пама поради масовните протести во својата земја вчера ја прекина посетата на Црна Гора и се врати во Тирана.
Според резолуцијата на Советот за безбедност на ОН усвоена во септември, цело сириско хемиско оружје, проценето на илјада тони, мора да биде уништено до 30 јуни наредната година.
Со гас маски на своите лица и со транспаренти – „Да му кажеме НЕ на хемиското оружје“ десетина граѓани вчера протестираа пред Албанската амбасада во Скопје со цел да се солидаризираат со граѓаните од соседна Албанија и да упатат порака до властите во Тирана да не дозволуваат хемиското оружје од Сирија да се уништи во Албанија.
Партијата ДОМ апелираше и до претставниците на албанската политика и Организацијата за забрана на хемиско оружје, да се откажат од идејата за уништување на 1300 тони сириско хемиско оружје во близината на Елбасан.