Авионот на Малезија Еарлајнс, кој беше погоден од ракета во Украина во зона која ја контролираат проруските сепаратисти, може да биде ставен во редот “воено злосторство”, изјави комесарот за човекови права на Обединетите Нации Нави Пилеј.
“Ова нарушување на меѓународниот закон, со оглед на приликите, може да биде ставен во редот на воени злосторства”, изјави г-ѓа Пилеј во соопштение објавено денес.
Таа очекува дека ќе биде сторено се одговорните за оваа драма да бидат изнесени пред правдата. “Од огромна важност е да се спроведе брза, детална, ефикасна и независна истрага за овој настан”, вели таа.
Авионот MH17 кој леташе помеѓу Амстердам и Куала Лумпур со 298 лица беше погоден од проектил на 17 јули во зоната во Украина што ја контролираат проруските сепаратисти кои ја имаат поддршката на Москва. Киев, Брисел и Вашингтон отворено ги обвинија сепаратистите и Москва дека се одговорни за трагедијата.