КООПЕРАЦИЈА ве поканува на едновечерниот настан на групата ОПА
ПРОЕКТ КОЈ НЕ Е ПРОЕКТ
(проекција на 42-минутно видео и промоција на книга)
22. 10. 2013 (вторник), 20:30 часот, Универзитет за туризам и менаџмент во Скопје (Бул. „Партизански одреди” бр.99, Скопје)
„Проект кој не е проект“ е патување низ Европа со 40 години стар „спачек“, кое ОПА (Опсесивно посесивна агресија) го реализираше во периодот од 2003 до 2006 година. Во 2006 год., во копродукција со театарскиот и перформанс фестивал „Трансуеропа” (Хилдесхајм, Германија) од документарните материјали од патувањата е создадено видео-делото со ист наслов. Својата премиера ова видео ја доживува на овој фестивал, во јуни 2006 год.
Во рецензијата „Pimp my ride! ОПА го прави фестивалот Tрансевропа трансевропски”,
објавена во „Хилдесхајмер алгемајне цајтунг”, ова видео, Мартина Пранте го посочува како едно од врвните збиднувања на тогашното издание на фестивалот „Трансевропа“. Па понатаму додава: „Уметноста на ОПА е политичка, а сепак во својата набљудувачка замисленост толку лесна, толку иронична и шеговита, што човек посакува да го напушти овој средноевропски комфор и веднаш да се качи во кола со нив.”
Покрај Хилдесхајм, видеото досега е прикажано во Цирих, Белград, Амстердам, Валенсиен, Париз и Њујорк.
Македонската премиера на овој проект беше планирана да се случи во
Националната галерија на Македонија пред неколку години, но финансиите одобрени од Министерството за култура за реализација на настанот и продукцијата на книгата, се загубија некаде во лавиринтите на Националната галерија, па овој проект ја доживува својата македонска премиера во рамките на „Кооперација”.
Публикацијата (издадена во 2012 год.) се состои од документарни фотографии од патувањата и преписки меѓу ОПА и нивниот соработник ХА (Сашо Талевски).
Во текстот кон овој настан на „Кооперација”, историчарот на уметност Владимир Јанчевски вели: „Симптоматично е тоа што судбината на овој проект е врзана за еден посебен вид егзил, ниту внатрешен, ниту надворешен, туку некако чудно „внатрешно-надворешен”. …приказната на ОПА, е приказна за уметникот, свесен за сопствената даденост во матрицата, и спремност за разоткривање на сложената мрежа на меѓуодноси. Ваквата одлука, е егзистенцијално одредена.”
OПА (Опсесивно посесивна агресија) е формирана во 2001 година од ликовните уметници Слободанка Стевческа (*1971, Скопје) и Денис Сарагиновски (*1971, Скопје). Двајцата студирале на Факултетот за ликовни уметности во Скопје. Работат на границите на ликовната, уметноста на новите медиуми и перформансот. ОПА, до сега, има самостојно изложувано во Македонија, Естонија, Словенија, Хрватска, Франција, Германија, САД и Холандија. Има учествувано на повеќе групни изложби и фестивали како Трансмедиале, Берлин; Freewaves – Биенале на нови медиуми, Лос Анџелес; Биенале на современи уметности, Москва; итн. Има остварено резиденцијални престои во Франција, Естонија, Германија и Швајцарија.