Вработените на Македонската опера и балет немаат основни услови за работа, во школката каде што работи оркестарот има голем провев, а 550 вработени од операта, балетот и филхармонијата работат на едно место бидејќи прокиснува покривот во Дом на АРМ каде што настапуваше филхармонијата, со што нема услови за нормално функционирање, вели за НОВА претседателот на Синдикатот на сценско музичките уметници Виктор Илиески.
Тој беше на службено патување во странство кога НОВА ја објави информацијата дека вработените во МОБ собираат потписи за смена на уметничкиот директор Александар Котевски,поради како што велат самоволието, мобингот кој го правел врз одредни вработени, лошите услови во кои што работат и малите плати. Илески излезе со шокантни податоци за катастрофалната состојба во која работат македонските уметници.
-Точно е дека петиција има во однос на промена на уметничкиот директор Александар Котевски иницирана од членови од оркестарот на МОБ. Демократски чин е поведување на постапки во однос на работењето на директорите од страна на вработените. Факт е дека условите за работа во Македонска Опера и Балет се отежнати и не се на задоволително ниво. но за овие проблеми одговорен е и генералниот директор Дејан Прошев. Уметниците не се должни да бараат решенија за овој горлив проблем, вели за НОВА Илиески.
Веќе се собрани 50 проценти од потписите во оркестарот , а на нив се очекува да им се приклучи и хорот. Петицијата со потписите треба да биде доставена до генералниот директор Дејан Прошев и министерката за култура Елизабета Канчевска Милевска.
Извори од оркестарот за НОВА велат дека дел од тие што се потпишале почнале да ги бришат своите имиња од страв од реперкусии и бркање од работа
Уметничкиот раководител Александар Котевски, пред неколку дена за НОВА изјави дека петицијата против него е дел од предизборието.
-Ова е предизборно. Нема да си одам, барем не по нивен налог, мене само генералниот директор Прошев може да ме разреши. Иницијативата за петицијата е од оние кои што не беа на гостувањето во Џакарта, а ние не можевме да ги земеме сите со себе. Но, јас ги почитувам и верувам во нив, вели за НОВА, Александар Котевски.
Првиот синдикалец потенцира дека нема да дозволи да се злоупотреби членството во овој предизборен период. Проблемите се реални и Синдикатот акцентот го става во немањето на основни услови за работа со префрлувањето на Македонска филхармонија од објектот на Дом на АРМ во просториите во МОБ. Од септември 2013 година до сега, не е преземено ништо во однос на поправка на покривот на домот на АРМ кој прокиснува кога врне или паѓа снег, вели Илиески.
.jpg)
Од синдикатот велат дека концертната сезона 2013/14 се ближи кон последното тримесечие, а нема најава за конкретни решенија со конкретни рокови од страна на Владата во однос на санирањето на покривот и привременото враќање на филхармонијата во домот на АРМ, бидејќи во МОБ нема слободни термини за нормално функционирање на ансабмлите на МОБ, а што е нарушено работното време на уметниците.
-Сите уметници апелираме во однос на изградбата и конечното завршување на концертната сала на Македонската филхармонија, како најстара оформена институција од културата оваа година славиме 70 години од нејзиното постоење. Салата започна да се гради март 2009 година, после 5 години објектот сеуште не е завршен надворешно, а уште поспецифична е изведбата на ентериерните акустички решенија, вели Илиески.
Уметниците и синдикалците сметаат дека е направен јаз помеѓу вработените и раководството од МОБ после катастрофалното организирање на гостувањето на МОБ во Франција. Но од Министерството за култура не биле превземни никакви конкретни мерки во однос на лошото организирано патување, иако тоа им било ветено на заеднички состанок во Министерството.
.jpg)
Како најголем проблем на двете институции се нагласува потребата од долго очекуваното потпишување на колективниот договор за култура.Платите на уметниците не се зголемени веќе седум години.
– Во тој период кога беше спроведена одлуката на актуелната Влада да се изврши корекција на платите беше на коректно ниво во однос на тогашниот стандард и во однос на просечната плата што беше официјална во тоа време. Тогашната плата на еден хорски и балетски уметник беше нешто над просечната. За жал во моментот платата на хорските уметници е 18.000 денари, што значи имаат потпросечна плата, а тоа се голем број вработени уметници од Македонската опера и балет потенцира Илиески.
Тој вели дека сето ова укажува дека во моментот уметниците се вратени на нивото пред седум години. Тие уште пред два месеца пратиле предупредувачко писмо до двајцата директори каде најавиле штрајк доколку не се решат проблемите, следувале преговори, но работата е статус кво.
-Ако тогашната свест на Владата била дека уметниците треба да бидат соодветно третирани, тогаш се поставува прашањето како да бидеме задоволни со примања од кои најголем број вработени во институциите имаат потпросечна плата, кога месечната потрошувачка кошница за четиричлено семејство изнесува околу 30.000 денари, прашува првиот синдикалец на сценско музичките уметници.
Од Синдикатот велат дека очекуваат после изборите Владата заедно со Министерството за култура како прва точка на дневен ред да го стави потпишувањето на колективниот договор на ниво на цела култура со сите финансиски импликации и нивелирање на платите на уметниците од националните установи. Синдикалците предупредуваат дека доколку после изборите не се потпише колективниот договор и не бидат зголемени платите, како и да се санира ситуацијата со лошите услови за работа, можен е штрајк на македонските уметници.