Аки Нуредини од тетовско Камењане, со хуманитарен концерт во Виенската опера го прослави 30- годишното работење на неговиот ресторан “Соле” во Виена со спектакл во кој учествуваа најголемите оперски ѕвезди на денешницата, објави “Вест”.
Во чест на Аки Нуредини бесплатно настапија 13 ѕвезди – оперски солисти: Карлос Алварез, Роксана Константинеску, Ервин Шрот, Стивен Костелјо, Рамон Варгас, Линда Вотсон, ѕвездите Хуан Диего Флорес од Перу, и новиот Доминго, како што го нарекуваат тенорот од Германија Јонас Кауфман,
Пласидо Доминго испрати поздрави преку видео-бим до г. Нуредини и неговото семејство.
Зошто токму опера? Во неговиот ресторан “Соле” каде секојдневно уживаат оперските ѕвезди -домашните, од Виена и ѕвездите кои гостуваат во Операта се доздадени силни пријателства со нив, взаемна почит и – оттука и огромната љубов на г. Нуредини кон операта.
Заедно со оперската елита славеа за г. Нуредини и вице-канцеларот и министер за надворешни работи на Австрија Михаел Шпинделегер и министерката за култура на Австрија Клаудија Шмит.
Од Македонија беа гости министрите Фатмир Бесими, Муса Џафери, градоначалничката на Тетово Теута Арифи, дипломатот д-р Срѓан Керим, професорката Ганка Цветанова, кардиохирургот Сашко Кедев, македонскиот амбасадор во Виена Ѓорги Филипов.
Со овој хуманитарен концерт г. Нуредини успеа да собере 130 илјади евра, кои се наменети за децата од Мексико, за фондацијата “Едуардо Варгас”, а воедно беше промовирана и книгата “До, ре, ми, фа Соле”, посветена на oперската историја врзана со случките во неговиот ресторан, каде што се договараат нови проекти, нови претстави, се среќаваат менаџерите, уметниците и се склопуваат пријателства и нови проекти.
