Коалицијата „Сојуз за иднината“ предводена од СДСМ поднела повеќе од 100 тужби до Управниот суд, бидејќи според нив, Државната изборна комисија одлуките ги донела со надгласување, а не врз основа на закон и аргументи.
Мнозинството на ВМРО-ДПМНЕ во ДИК го претворило овој државен изборен орган во политичка инквизиција, изјави денеска потпретседателката на СДСМ Ана Павловска-Данева.
Според неа, најдобар доказ за тоа е фактот што мнозинството на ВМРО-ДПМНЕ во ДИК ги одбила нивните приговори не водејќи сметка за ниту еден факт и без притоа да се направи увид во избирачкиот материјал на оспорените избирачки места.
Членовите на ДИК, кои одбиле повеќе од 300 приговори на опозицијата, за Струмица прифатиле приговори без никаков правен основ со кои сакаат да му ја украдат убедливата победа на градоначалникот Зоран Заев нагласи Данева.
Од Коалицијата се надеваат дека Управниот суд ќе покаже висока професионалност и независност во одлучувањето по тужбите и ќе пресудат ослободени од политички притисок, водејќи се единствено според Уставот и законите.