Демократијата е поразена, порача вечерва потпретседателот на ВМРО – ДПМНЕ, Александар Николовски откако опозицијата не успеа да обезбеди кворум за работата на денеска закажаната седница на Собрание, на која единствена точна на дневен ред требаше да биде гласање доверба на Владата. Причината за ова беше отсуството на пратеникот од Движењето Беса, Кастриот Реџепи, а лидерот на Беса, Биљал Касами изрази загриженост за безбедноста на пратеникот.
Опозициските пратеници го напуштија Собранието. ВМРО-ДПМНЕ и коалицијата бараат брзи предвремени избори за излез од политичката криза во која се наоѓа државата. Потпретседателот на ВМРО-ДПМНЕ Александар Николовски вечерва пред Собранието во име на целата коалиција изјави дека ова е единственото решение во моментот.
– Погазена е демократијата, беше киднапиран пратеник. За тоа ќе има одговорност, рече Николовски, додавајќи дека СДСМ и коалицијата се обидуваат по секоја цена да останат на власт.
Ваквиот потег на опозицијата следи откако денеска во законодавниот дом не се појави пратеникот од редовите на Движењето Беса, Кастриот Реџепи, кого лидерот на Беса, Биљал Касами го пријави во полиција за исчезнат, а тој потоа се јави на „Фејсбук“ и кажа дека се наоѓа на „безбедно“. По ова, Касами изјави дека е убеден оти видеото е направено под присила. Тој вечерва пред Парламентот рече дека се грижи за безбедноста на пратеникот Реџепи.
– Веруваме и убедени сме дека ова видео е направено под присила бидејќи е направено во моментот кога јас одам во полиција да пријавам. Ако пратеникот бил слободен доброволно на некоја позиција требало да ги информираат органите на редот, а не мене да ми кажуваат од полиција дека “да, знаеме каде е пратеникот”, рече Касами.
Денеска опозициските пратеници очекуваа дека нема да го загубат мнозинството и дека ќе изгласаат недоверба на Владата, нешто што го најавуваа цела недела.