Општината Зрновци која се наоѓа во Источна Македонија, ќе гради стационар за бездомни кучиња во кругот на фабриката за селектирање комунален смет. Стационарот ќе биде изграден на површина од 100 метри квадратни.
Предвидено е во стационарот да има боксови за сместување на кучињата, а ќе има и третман на заловените кучиња. Истретираните и здравите кучиња ќе може да се посвојуваат.
„По многу предупредувања и апели до граѓаните да ги вдомат своите кучиња и да ги отстранат од јавните површини бидејќи станаа опасност за граѓаните, одлучивме да се отвори стационар каде што ќе бидат сместени сите овие кучиња кои не се обележани и кои ќе бидат прогласени за скитници. Понатаму ќе следува процес на заловување на тие кучиња каде што ќе бидат третирани, хранети се до моментот додека некој не пројави желба да си посвои некое од кучињата или, пак, додека не се појават сопствениците да си го земат кучето, секако со плаќање одреден надомест“, изјави Блаже Станков, градоначалникот на општина Зрновци.
Како што најави градоначалникот, на тендер ќе се избере фирма која ќе ги заловува кучињата, а за животните ќе се грижат активисти.