Наспроти изјавите со позитивен тон од бугарскиот премиер Кирил Петков за можноста од постигнување договор со нас, што би придонесло за деблокада не само на македонската туку и на европерспективата во регионот општо, во бугарското општество се уште се силни тенденциите кои влечат на спротивната страна и кои во нас гледаат како на укорен ученик без воља за поправање.
– И покрај аматерскиот оптимизам на Кирил Петков дека ќе има први резултати во јануари, 4 месеци подоцна, не е решено ниту едно важно прашање што доведе до вето: Република Северна Македонија (РСМ) нема намера да се откаже од тврдењата за југословенското малцинство со кои се соочуваме. Скопје нема намера да го почитува Договорот за пријателство во однос на јазичната клаузула, а камоли работата на историската комисија. Таму работите се замрзнати на ниво од 2019 година, стои во текстот на главниот уредник на бугарската новинска агенција БГНЕС, Георги Пашкулев.
Неподготвеноста на властите во Република Македонија да вложат макар и минимални напори за европските односи со Бугарија практично ја уништува секоја надеж за почеток на преговорите за членство во ЕУ, наведува тој во коментарот.
– Никакво незнаење на Кирил Петков, ниту цинизмот на Даниел Лорер или агресивноста на нивниот гуру, нема да доведат до укинување на ветото. Димитар Ковачевски и Бујар Османи ги следат стапките на Никола Димитров и Радмила Шекеринска. Крајот е претскажан. За жал, PCM изгуби уште една година, пишува во својот коментар Пашкулев.
Со слични тези денеска од парламентарната говорница на бугарското собрание се огласи заменик – претседателот на ГЕРБ и пратеник Даниел Митов, кој го повика Петков да внимавал на терминологијата кога давал изјави за Република Северна Македонија.
– Никогаш не го користи терминот малцинство. Ние не бараме никакви права за бугарско малцинство. Бугарите во РСМ мора да добијат статус на државотворен народ. Ве повикувам да бидете внимателни кога зборувате. Бугарија не признава колективни права, туку индивидуални според уставот. Ваквиот говор може да создаде проблеми во иднина, предупредил Митов, кој е и поранешен министер за надворешни работи.
Ваквите напади кон Петков доаѓаат и покрај тоа што претходно бугарскиот премиер појасни дека не би му паднало на памет да потпише никаков договор со Македонија без тој договор да го помине филтерот на бугарската опозиција и парламент.
(М.Т.)