Бугарија го поддржува членството на Република Македонија во НАТО и ЕУ, но и натаму инсистира на договорот за добрососедство и соработка, изјави на денешната заедничка прес-конференција бугарскиот премиер Пламен Орешански со премиерот Никола Груевски во пограничниот бугарски град Ќустендил по неформалната заедничка мини седница на владите на двете земји.
– Бугарија го поддржува членството на Република Македонија во НАТО и ЕУ, како и на сите земји од Западен Балкан. Инсистираме на Договорот за добрососедство и соработка и се надеваме дека работата за тоа ќе продолжи со зголемено темпо. Му подвлеков на премиерот дека за надминување на постоечките недоразбирања добро би било да организираме заедничко чествување на одредени историски настани и личности кои различно се толкуваат во двете земји, изјави Орешански.
Премиерот Груевски истакна дека „Двете земји и двата народа се преодредени да соработуваат и на економски и на политички план.
„Го истакнавме значењето на натамошното зајакнување на регионалната соработка, а беше констатирано дека постои поголем простор за соработка во економијата. Од интерес на Македонија и Бугарија е воспоставување на покоординирана соработка”, изјави по средбата македонскиот премиер.
>>Груевски пречекан со скандирања – Македонија е бугарска
Бугарските националисти пак, не пропуштија прилика за провокации па така пред почетокот на средбата, десетина припадници на бугарското ВМРО на Красимир Каракачанов протестирале на плоштадот во близина на општинската зграда, каде и беше одржана средбата меѓу двете владини делегации.