„Birdman“ на мексиканскиот режисер Алехандро Гонзалес Инариту е прогласен за Најдобар филм на 87-то доделување на Оскарите. Исто така, филмот ги собра наградите за за најдобра режија, за оригинално сценарио и за најдобра фотографија.
Откако ја доби наградата БАФТА, и Златниот глобус, Еди Редмејн е прогласен и за Најдобар актер за улогата на физичарот Стивен Хокинг во филмот „The theory of everything“.
По четири номинации, актерката Џулијана Мур во петтата „конечно“ доби Оскар за Најдобра актерка за филмот „Still Alice“ во кој игра жена заболена од Алцхајмерова болест.
Актерот Џеј Кеј Симонс е добитник на Оскар за Најдобра машка споредна улога во филмот „Whiplash“ на режисерот Демијен Шазел.
Патриша Аркет е Најдобрата женска споредна улога, во филмот „Boyhood“.
Оскар за најдобар странски филм доби полското остварување „Ида“ на режисерот Павел Павликоски, црно-бел филм за калуѓерката која е во потрага по своето минато и сознанието дека имa еврејско потекло.
„Big Hero 6“ во продукција на „Волт Дизни“ е прогласен за најдобар анимиран филм. Филмот „Citizenfour“ на режисерката Лора Појтрас за Едвард Сноуден, службеник на американската безбедносна агенција НСА кој ја откри глобалната програма за прислушкување во САД и ширум светот, доби Оскар за најдобар документарен филм.