Портпаролот на ДУИ, Бујар Османи за НОВА ја коментира изјавата на премиерот Груевски дека ЕУ ја вади ДУИ од Владата:
-Меѓународната заедница никогаш нема побарано од нас да го условиме решението на спорот за името со излегување од Влада. Напротив, секогаш бараат заеднички да се динамизираат напорите за решение на спорот.
Инаку, го поздравуваме ставот на премиерот, со кој бара директен дијалог со Р.Грција за новиот предлог на Нимиц, став кој и ние го комуницираме деновиве и јавно и на нашите средби со внатрешни субјекти и меѓународната заедница, вели Бујар Османи за НОВА, околу ставот на премиерот Никола Груевски во интервју за Дневник, каде вели:
-Европа ни испраќа абера дека ќе ја извади ДУИ од Владата околку не попуштиме околу спорот за името .
Ни праќаат абери дека ДУИ може во секој момент да ја извадат од Владата ако така решат и со тоа Владата да падне, вели Груевски за Дневник и додава дека е подготвен за секое сценарио. Не ја исклучува можноста да ни биде одземена и препораката за стартна преговорите.
„Ништо не можам да исклучам. Се што доделуваат може и да го одземат. Само душата не можат да ни ја земат“ – вели Премиерот.
„Не разбирам како СДСМ може да постави вакво прашање кога не цела Македонија, туку цел свет знае зошто Македонија не влезе во НАТО и не доби датум за почеток на преговорите со ЕУ. Единствена причина е што не прифативме промена на идентитетот на Македонците и на името на државата, а и таа промена да е по мера, да не речам по избор на Грција, истовремено одбегнуваат преговори и очекуваат с` да биде како што тие бараат.
Еве, ако ме повикуваат да одговорам – ова е одговорот, иако тие добро го знаат. Блокадата во Букурешт во 2008 година заедно ја преживеавме кога со нивниот татко по ДНK, Бранко Црвенковски, бевме таму и двајцата дадовме речиси идентични изјави. Тоа што СДСМ потоа се престрои и се извлече од одговорноста е друго прашање.
Но во целиот период потоа ние ги исполнувавме сите потребни критериуми, реформи и очекуван напредок, освен еден: оној што го бара Грција, вели Груевски за Дневник.