По неформалната заедничка мини седница на владите на двете земји во Ќустендил од ДУИ велат дека не е заедничка владина седница меѓу Македонија и Бугарија.
Според партискиот портпарол, Бујар Османи, кој денеска за Алсат-М коментираше зошто во Бугарија не заминале и министри на ДУИ, седница на владите на Македонија и Бугарија е планирана за во иднина.
Ова денеска, вели Османи е само средба на делегација на чие чело бил Груевски, односно нешто слично на средбите на Али Ахмети со неговата делегација во Софија.
„Сметам дека тука има недоразбирање. Јас не ја знам причината зошто владиниот портпарол оваа средба ја претстави како заедничка седница на владите. Всушност, тоа што се случи денеска е посета на премиерот на Македонија со негова делегација во Бугарија по барање на Груевски и во таа делегација се неговите соработници кои покриваат теми во рамките на иницијативата за добрососедство која е иницирана меѓу двете држави, односно за Коридорот 8, од страна на министерот за транспорт и за енергетски прашања и вицепремиерот Пешевски.
Ова е слично со посетата што ја имаше Али Ахмети со неговата делегација во која беше вклучен и вицепремиерот Муса Џафери. Во иднина ќе има заеднички седници на владите во рамките на седниците што ги организира Владата на Македонија со соседите“, рече Бујар Османи – портпарол на ДУИ.