Отворен притисок врз медиумите, вака Независното здружение на новинарите на Србија (НУНС) вчера ги оцени навредите на српскиот премиер Алекасандар Вучиќ кон Балканската истражувачка мрежа (БИРН).
Вучиќ во петокот остро реагираше на текстот на БИРН во кој се тврди дека српското Електростопанство за испумпување на вода од Рударскиот басен „Колубара“ ангажирала конзорциум без искуство со што значајно си ги зголемило трошоците.
– БИРН се тие што лажеа за „Ер Србија“, тие се оние што добија пари од господинот Мајкл Девенпорт (н.з. евроамбасадорот во Србија) и од Европската Унија (ЕУ) да зборуваат нешто против Владта на Србија. На тие лажговици кажете им дека повторно лажеле – изјави Вучиќ.
Новинарското здружение оцени дека речникот на Вучиќ припаѓа на некои минати времиња и оти тој не е прифатлив за едно демократско општество и за држава, која според зборовите на самиот премиер, сака да биде дел од ЕУ. НУНС предупреди дека во една држава не е возможно да се формира критичката јавност без истражувачкото новинарство.
Координаторот на БИРН за Србија, Слободан Георгиев за српските медиуми изјави дека БИРН стои зад текстот кој е 100 отсто вистинит, а на обвинувањата на Вучиќ реагираше и делегацијата на ЕУ во Србија.
– Многу сме изненадени од последните тврдења на премиерот на Србија, Вучиќ за тоа дека ЕУ плаќа одредени организации да водат кампања против Владта на Србија. Одлучно ги отфрламе ваквите неосновани тврдења – изјави портпаролката на мисијата, Маја Коцијанчиќ.