Осум јапонски филмови ќе прикажува Кинотека на Македонија во циклусот Современ јапонски филм до 29 октомври.
Вечерва на програмата е филмот „Пачиги! љубов и мир“, утревечер е „Валканата афера Мацугане“.
Во недела од 18 часот ќе биде прикажан „Жабата што се смее“, а од 20 часот „Мачката го напушта домот“.
Во понеделник, вторник и среда ќе играат „Сината пролет“, „Уште една борба/ завера“ и „Жарови“.
Циклусот јапонски филмови е резултат на соработка помеѓу Кинотеката и Амбасадата на Јапонија а е во знак на одбележување 20 години од воспоставувањето дипломатски односи меѓу Македонија и Јапонија.
Јапонскиот амбасадор во Македонија, Макото Такетоши, посочи дека филмовите третираат различни аспекти на современа Јапонија.
– Тие ги прикажуваат различните аспекти кои се поразлични од онаа општа слика за јапонското општество, така што публиката ќе може да доживее разни форми на човечки драми, рефлектирани во филмовите произведени во првата декада на ова столетие. Публиката ќе ја открие димензијата на новата Јапонија и ќе го проникне интересот за мојата земја, вели Такетоши.