После искреното добредојде од колегите од Албанија, ја започнуваме работната вечера на „Отворен Балкан“, заедно со претседателот Вучиќ и со нашиот домаќин, премиерот Рама. Утре продолжуваме со работната агенда, на којашто ќе потпишеме повеќе договори за реални придобивки и добробит на нашите народи, напиша премиерот Зоран Заев во објава на Фејсбук, во пресрет на утрешниот седми состанок во рамки на иницијативата „Отворен Бакан“.
Во македонската делегација, што ја предводи Заев, се новиот лидер на СДСМ и заменик министер за финансии Димитар Ковачевски и заменик министерот за земјоделство Трајан Димковски, како и голем број стопанственици.
– Од првата средба во Скопје во јули до првото потпишување на договорите коешто ќе се случи во Тирана, покажавме дека силната политичка волја може да се трансформира во брзо функционирање на нашите институции. Со тоа го потврдуваме нашиот капацитет како земји за спроведување брзи, ефикасни и напредни реформи и политики за регионална соработка, рече Заев.
Македонската и српската делегација, предводени од Заев, односно претседателот Алекандар Вучиќ, вечерва во Елбасан беа пречекани од домаќинот, албанскиот премиер Еди Рама и вицепремерот Арбен Ахметај и министри од владата.
Според Ора њуз, на вечерата присуствувал и Александар Сорос, син на милјардерот Џорџ Сорос, кој е голем пријател на Рама. Тој во Елбасан пристигнал со приватен автомобил.
Според официјалната агенда, утре во 9 часот делегациите треба да прстигнат во Палатата на бригадите во Тирана, по што во 9:05 ќе има средба Рама-Заев-Вучиќ. Во 9:30 почнува состанокот на кој прв ќе се обрати домаќинот, Рама, потоа Вучиќ, па Заев како и Комесарот за проширување и добрососедска политика, Оливер Вархеји, генералниот секретар на Советот за регионална соработка, Мајлинда Брегу, директорот на Секретаријатот на ЦЕФТА, Емир Џикиќ, како и директор на Транспортната заедница, Матеј Закоњшек. По потпишувањето на петте договори за во 13 часот е најавена заедничка прес конференција.
Попладнево во Тирана се одржа најавениот протест против иницијативата „Отворен Балкан“, кој е организиран од страна на албанската опозициска Демократска партија и поранешниот премиер Сали Бериша.
Дводневниот состанок за иницијативата за регионална соработка „Отворен балкан“ во Тирана, а токму тоа е и главната причина за протестот, поради што демонстрантите биле забележани како палат српски знамиња.
Демонстрантите носеле транспаренти со пораки напишани против иницијативата „Отворен Балкан“, претседателот Вучиќ, Рама и Џорџ Сорос.
Албанскиот премиер Еди Рама го осуди палењето на српските знамиња како и изјавите на Бериша, тврдејќи дека треба да им биде срам на сите кои денеска протестираа на улиците во Тирана.
– Нека се срамат тие што го направија ова, а не јас и мојата влада, кои имаат поддршка од Албанците да работат, да се развиваат, да не ги трпат последиците на старата албанска политика, истакна Рама.
https://www.youtube.com/watch?v=JDl1g75cOWY