Пациент кој бил хоспитализиран со крварење во мозокот поради мозочен удар, избегал во два часот по полноќ од Клиниката за неврологија, без никој да го забележи, тврди неговото семејство.
Станува збор за 76-годишниот Никола Николовски кој бил примен на Клиниката на 23 јуни, а на 3 јули откако паднал во кома бил префрлен на Клиниката за неврохирургија каде што по два дена починал.
Неговата ќерка Снежана Лазаревска е револтирана бидејќи на Клиниката не ја информирале што се случило критичната ноќ, туку за случајот дознала од клиничкото обезбедување. Таа тврди дека татко и бил пронајден на влезот на скопските клиники гол и бос, само со пелена на него.
Утредента, по случајот татко и го нашле прикован за кревет, врзан со завои. На Клиниката тврделе дека немало таква случка.
-Многу ми е тешко, револтирана сум и сакам да знам како можеле да дозволат да им избега пациент, а згора на се и да не го информираат семејството за тоа. Татко ми пред да се случи ова беше подвижен, стануваше, сакаше да си оди дома, изјави низ солзи Лазаревска.
Семејството на Николовски немаат забелешки на лекувањето, благодарни се на лекарите од Клиниката, но бараат одговорност и објаснување како можело да се случи, никој од дежурниот персонал да не забележи дека го нема пациентот во кревет.
-Што ќе се случеше да не го најдеа, или пак да го најдеа некаде на Водно, дали тогаш ќе ја кажеа вистината, вели Лазаревска.
Директорот на Клиниката за неврологија Игор Кузмановски, тврди дека такво нешто не се случило на оваа клиника бидејќи случајот воопшто не е евидентиран.
-Такво нешто не може да се крие. Таков случај не е пријавен, ниту евидентиран од дежурните служби. Згора на се тој пациент не можел да стане бидејќи бил со крварење во мозокот, изјави за НОВА Кузмановски.
Со вакво тврдење Кузмановски излезе откако претходно најави дека ќе го испита случајот. Тој првично објасни дека немаат ноќна служба која ќе го ограничи движењето на болните, односно немаат вработен кој после 16 часот ќе стои на врата.
-Ноќните служби работат со над човечки напори, имаат многу интервенции, итни случаи. Вратата е постојано заклучена ноќе, но можно е во ситуација кога се носи итен случај и кога влегуваат многу луѓе од семејството, да се случи да излезе пациент. Ние ги врзуваме пациентите кои се непресметливи, конфузни, агресивни, стануваат од кревет бидејќи секое движење може да ја вложи нивната здравствена состојба, рече Кузмановски.
Тој додаде дека капацитетот е толкав што ноќе работат со двајца болничари и неколку медицински сестри, а на одделението каде што се најтешко болните има околу 60 кревети.
Минатата недела биле примени, две медицински сестри и двајца болничари.