Стакло од прозорец паднало во ходникот на Хирушките клиники во петокот дознава НОВА од лекарски извори на клиниките. Прозорецот цели шест дена стои паднат и нема кој да го поправи, а во ходникот кој е климатизиран влегува топол воздух, тврдат нашите извори. Она што е застрашувачки, низ прозорецот влегуваат бактерии и спори кои се шират низ ходникот и влегуваат во хируршките сали, каде што мора да има стерилни услови за да се оперираат пациенти. Ходникот е заеднички за сите 16 операциони сали и веќе шест дена преставува опасност, не само за пациентите туку и за вработените, а ја нарушува работата на хирурзите.
-Добро е што при паѓањето прозорецот не паднал врз некого бидејќи можело да загине. Прозорецот се уште стои така, нема кој да даде наредба да се поправи. Освен топол воздух кој смета во работењето, во хируршките сали влегуваат и бактерии, со што пациентите се изложени на ризик, велат револтирано за НОВА лекари кои утринава оперирале во хируршките сали.
Лекарите објаснуваат дека одкога се подели Клиничкиот центар на посебни единици, не се знае кој стопанисува со објектот. Бидејќи станува збор за ходник кој е заеднички на сите Хируршки клиники, очигледно нема одговорен кој ќе го санира дефектот.
Освен ова, лекарите се жалат дека заедничките делови на зградите кои не се одржуваат, а паркот и паркингот се претворени во „музеј на ѓубре и нечистотија“. За овој проблем очигледно нема кој да се грижи.
И додека министерот Тодоров ќе ги учи лекарите и медицинските сестри како да се облекуваат, еве како медицинскиот персонал се однесува со униформите по излегување од операциона сала. Ова е машката гардероба на Хируршките сали, каде очигледно не важат правилата на Тодоров.
НОВА се обиде да го добие последниот координатор на Хируршките клиники, кој беше поставен во време на екс министерот Бујар Османи, за да прашаме кој сега е одговорен за заедничкиот простор на овие клиники но, и тој беше во операциона сала каде оперираше пациенти во ново настанатата ситуација.