Луѓето кои веќе две недели кампуваат бранејќи го паркот кај хотелот Бристол овие денови ги засилуваат активностите со цел омасовување на одбраната и зачувување на зелените површини во Општина Центар.
За таа цел од денеска започна со работа “Летен Камп Бристол” кој со по неколку дневни активности ќе го оживува местото и собира истомислениците во одбрана на паркот.
Утрово се одржа шаховски турнир на кој беа поканети “шахистите” од паркот “Жена – Борец”.
Покрај тоа Паркобраните најавуваат и кино под отворено небо, следење на спортски натпревари, бесплатен интернет и разни добротворни активности до крајот на месецов.
За вечерва е најавен протестен настан под мотото “Смрт за Фашизмот, Слобода за Слободата”. На настанот ќе има видео презентација, говори и за прв пат во живо ќе биде изведена песната која е создадена за борбата за слобода на слободата.
Паркобраните ги повикуваат сите добронамерни луѓе да им се придружат во одбраната на паркот.