123 маички со натпис “Слобода за Кежо” денеска беа предадени во Собранието, односно во Архивот, од страна на Иницијативниот одбор за ослободување на новинарот Томислав Кежаровски.
-Овие маички ги оставивме во Собранието, да и бидат дадени на секоја парламентарна група и се надеваме дека пратениците ќе ги облечат во понеделни, во знак на протест и поддршка на нашата заложба за укинување на притворот но и во име на борба за слободата на изразување и слободата на медиумите, во време кога функционирањето на системот е сериозно ставен под прашање. Сметаме дека Собранието како храм на демократијата и дом на граѓаните треба прво да застане во одбрана на овие слободи, изјави Сашка Цветковска од Иницијативниот одбор.
Според некои најави, судењето за новинарот на „Нова Македонија“ Кежаровски, ќе се одвива по итна постапка.
Претседателот на Основниот суд Скопје 1, Владимир Панчевски, за „Утрински весник“ изјавил дека имајќи ги предвид сите случувања изминативе денови и штрајкот со глад на новинарот Кежаровски, судењето ќе почне во многу скоро време и нема да се чека до септември:
-Судењето ќе почне летово по итна постапка и на него ќе бидат презентирани сите докази од обвинението кои беа поднесени деновиве, вели Панчевски.
Кежаровски беше приведен пред повеќе од два месеци и се наоѓа во притвор поради текст објавен пред пет години, за обвинение декаго разоткрил идентитетот на заштитниот сведок во случајот со платеното убиство во велешкото село Ореше.
Според првиот човек на Кривичниот суд, станува збор за тешко кривично дело за кое е предвидена казна од минимум 4 години затвор.
Кежаровски е првиот новинар да биде притворен и да одговара за откривање идентитет на заштитен сведок. И покрај апелите на меѓународните и домашните медиумски организации и оние за човекови права, Кежаровски да биде пуштен во домашен притвор, засега таков епилог не се најавува од Судот.