Пациентите околу 16 и 30 часот веќе биле тргнати да си одат кога се појавил ПР советникот на министерот Таравари и започнал да ги враќа лекарите од дома.
Околу 25 пациенти во инвалидски колички кои биле дојдени на Комисија за утврдување на инвалидитет со часови чекале во ходникот на Хируршките клиники бидејќи ниту еден од лекарите од комисијата не се појавил за да ги прегледа. Ова се случувало денес, вторник попладне кога пациенти со тежок инвалидитет биле дојдени од цела држава на закажани термини, а членовите од лекарската комисија не само што не дошле, туку не ги ни известиле пациентите предвреме да не тргнуваат од дома.
На фотографијата на НОВА се гледаат стари изнемоштени, тешко болни луѓе како беспомошно чекаат, дојдени од сите градови во државата во придружба на своите најблиски.
Дел од нив околу 16 и 30 часот веќе биле тргнати да си одат кога се појавил ПР советникот на министерот Таравари, кој некој од нив го побарал да интервенира. Тој им ветил дека ќе бидат прегледани сите до еден и започнал да ги враќа лекарите од дома.
Комисијата е составена од шест лекари и нивни заменици, ортопеди, трауматолози, хирурзи, некои од нив на раководни и директорски места, како што е директорот на Ургентниот центар, на пример.
Од Министерството за здравство за НОВА потврдија дека на крај успеале да ги соберат лекарите кои ги прегледале измалтретираните пациенти. Нивното образложение било дека членовите на Комисијата не можат да се соберат во полн состав, но кога биле повикани да се вратат, сите се појавиле.
Во четвртокот минатата недела, истите пациенти се јавија во НОВА во доцните попладневни часови откако членовите на Комисијата за утврдување на инвалидитет не се појавиле на закажаниот термин. По неколку часовно чекање пациентите си заминаа дома.