Пациентите со хронична миелоична леукемија, на кој не им делува лекот кој се наоѓа на рецепт, наскоро ќе ги добијат неопходните лекови. За почеток терапија е обезбедена за околу 20 пациенти , потврди за НОВА министерот за здравство Арбен Таравари. Овие пациенти беа оставени без лекови, полека да умираат.
“Лековите ќе ги има наскоро. Со ребалансот на буџетот во септември ќе ги обезбедиме овие средства, но пациентите нема дотогаш да чекаат на лекот. Веќе е разговарано со веледрогеријата која го увезува лекот и тие ветија дека ќе ни ги испорачаат многу порано, најмногу за месец-два. Ќе ги земеме на реверс, а ќе им ги платиме од септември“, изјави за НОВА министерот Таравари.
Вкупно 30 проценти од пациентите или околу 40 болни чекаат на лековите од втора или трета линија во лекувањето бидејќи не им делува лекот кој што е достапен на рецепт. За еден пациент на кој не му помага ниту еден од овие лекови, од здружението обезбедиле донација, а останатите проблемот со лековите ќе се решава во од. Во здружението за ХМЛ велат дека се задоволни од разговорот со министерот и дека од нешто мора да се почне.
„ Очекувам дека ќе се завршат работите, министерот со својата сериозност и загриженост за пациентите ветува дека ќе ги добиеме лековите“, изјави Пепо Леви претседател на здружението за ХМЛ.
Откако НОВА објави дека овие пациенти се оставени без лекови, тивко да умираат Таравари реагираше експресно и ги повика членовите на здружението во неговиот кабинет, по што е изнајдено заедничко решение.
Станува збор за многу скапи лекови. Месечната терапија за еден пациент со ХМЛ чини околу 3500 евра, но министерот рече дека преговарале и да се намали цената.
Таравари вчера изјави дека буџетот на Министерството е половина потрошен, а лекови за пациентите нема. Се уште не се знае каде се потрошени парите.