„Како и мнозинството наши луѓе, големи беа моите очекувања дека ќе ја унапреди и развие Македонија. Денес, кога целокупната моќ на државата е во рацете на Груевски, тој е обврзан да внимава кој ги раскопува гробиштата на славните претци. Да не знаеше дека нашата историја била запишувана на песок за да ја одвее ветрот, може да му се прости, но Груевски знае. Ако не пронајде начин да му се извини на покојниот Јаневски, џабе му се сите улични споменици од „Скопје 2014“, вели во интервју за „Утрински“ академикот и писател Божин Павловски кој неодамна беше прогласен за соработник на тајните служби.
Лустриран академикот и писател Божин Павловски
Павловски вели бил посетен од новинар од медиум кој страстно ја поддржува актуелната власт, за да го извести дека бил жртва во досието на Славко Јаневски и посебно во досијеата на Трајан Петровски и Паскал Гилевски. Барал изјава од Павловски во кој би го осудил Славко Јаневски.
„Тоа ми засмрде на неофашизам. Излегов во јавноста дејствувајќи според сопствената совест, за да разбудам нечија совест“, дополнува во интервјуто писателот.
Божин Павловски вели исплашеноста е хендикепот на нашата интелигенција.
„Со тоа што им ги обезбедува платите, власта ги држи в раце“, вели Павловски.
Божин Павловски: Збогум, со здравје, излегувам од МАНУ и ДПМ
Во врска со изјавите на претседателот на Лустрациска, тој вели дека ваквите потези од заднина ги координира некој опасен македономразец, исполнет со злоба и фрустрации.
„Имате ли некаде пример за споредба каде што се лустрираат одамна починати? Само кај нас“, вели Павловски.
Во завршните зборови Павловски се осврнува и на економската состојба во поглед на инвестирањето и менаџирањето со парите. Според него, кога големите кредити на актуелната власт веќе нема да можат да се менаџираат, главен проблем ќе бидат илјадниците државни патриоти, од кои само третина, вели, му припаѓаат на Ахмети.
„Кога ќе снема пари во буџетот, тие ќе се владеат како напуштени проститутки“, завршува Павловски.