Не 50 000 тони туку 100 000 тони пченица ќе ни испорача Србија. Ова го потврдиле низ телефонски разговор македонската и српската влада која од денеска го одмрзна извозот за овие производи, кој малку се оддолжи поради изборните активности во земјата.
Министерот за земјоделство, шумарство и водостопанство Љупчо Николовски порача дека нема место за страв и паника ниту кај мелничарско – преработувачката индустрија ниту кај граѓаните дека ќе се остане без лебно жито.
– Производителите на леб имаат залихи од 25 000 тони, со денешната одлука на српската влада, стартува да се испорачува договорениот контингент на пченица од 100 000 тони. Паралелно сме во разговори со бугарската влада која предложи да набави пченица одредено количество и за нас, зашто била во подготовка набавка на огромно количество на пченица. Ќе ги искористиме сите можности независно што некои велат дека сме молеле, дециден е министерот за земјоделие.
Македонија под насади од пченица годинава има 74 000 хектари од кои се очекува принос од 255 000 тони, соопштуваат од министерството за земјоделие.
Николовски информира дека за 400 милиони денари бил зголемен годинешниот интервентен фонд , со кој ќе се субвенционирале владини мерки за земјоделството во вредност од 10 милиони евра.
За на 15 април, Николовски најави објава на 7 мерки во вредност од 500 милиони денари, за производителите пред се на житни култури. Владините мерки би се фокусирале на набавка на трактори, силоси, системи за наводнување, комбањи за оризопроизводителите, мерки за производителите на тутун и мерки за млади земјоделци и рурални жени.
Наредните 10 дена министерството ќе објави огласи за издавање земјоделско земјиште а се трага и по запуштено земјоделско земјиште.
(М.Т.)