Претседателот на Република Северна Македонија, Стево Пендаровски денеска го прими Комесарот за соседска политика и преговори за проширување на Европската Унија, Оливер Вархеји.
Комесарот Вархеји на претседателот Пендаровски му го предаде Извештајот на Европската комисија за Македонија за 2020 година.
Заблагодарувајќи се за ангажманот на комесарот Вархеји и неговата цврста поддршка на перспективата за проширување на Европската Унија со земјите од Западен Балкан, претседателот Пендаровски истакна дека Извештајот дава детален приказ на состојбите во државата и степенот на реализација на реформите. Според претседателот Пендаровски, извештајот на комисијата дава поттик за натамошно интензивирање на реформската агенда во сите сфери посочени во документот и претставува чекор кон формален почеток на пристапните преговори за членство за време на германското претседателство со ЕУ, до крајот на годината.
„Претставениот извештај на Европската Комисија дава детален приказ на состојбите во државата и степенот на реализација на реформите и претставува поттик за натамошно интензивирање на реформската агенда во сите сфери посочени во документот. На денешната средба со еврокомесарот Оливер Вархеји го поздравив претставениот Економски и инвестициски план за Западниот Балкан што има за цел да го поттикне долгорочното економско закрепнување на регионот, што е дополнително отежнато поради пандемијата од КОВИД-19“, напиша на својот ФБ профил, претседателот Пендаровски.
.