Лошото урбано планирање, погрешното паркирање, непочитувањето на законите, а и невниманието како и непосветеноста кон сообраќајот, се најголемите причини поради кои околу 40 пешаци годишно гинат во сообраќајки, а во околу 200 несреќи учестуваат.
Во најголемиот дел од случаите, пешаците не се директни виновници, но најмногу ги трпат последиците.
– Дел од нив се на возраст до 20 години, меѓутоа поголемиот дел се постари лица со забавена динамика, вели за НОВА професорот Миле Димитровски од Републичкиот совет за безбедност во сообраќајот.
Во рамки на стратегијата која се применува во Македонија, Димитровски посочува дека подобрите праткики од другите земји, се применуваат и во земјава, а од Републичкиот совет се трудат низ повеќе едукативни сесии во сферата на сообраќајот, особено за возачите, да го намалат бројот на загинати пешаци.
Според Димитровски, еден значителен удел во подобрувањето на статисиката би имале постарите лица кога не би чувствувале срам или одбивност кон светлата облека, особено во вечерните часови. Дополнителни механизми се флуоресцентни траки, или „мачкино око“ кои евтино можат да се набават на бензинските пумпи.
Од друга страна, дел од граѓаните кои одговараа пред камерата на НОВА, велат се чувствуваат безбедно како пешаци-учесници во сообраќајот, бидејќи секогаш ги почитуваат правилата, а друг дел од нив, бараат поголема одговорност и претпазливост од возачите.
По загрижувачките бројки за загинати пешаци, и по повод еднонеделната кампњата „Неделата за безбедност на пешаците во Република Македонија“, министерката за внатрешни работи, Гордана Јанкуловска, во својство на едукатор, денеска делеше зелени и црвени флаери за правилно однесување на пешаците во сообраќајот.