Обвиненијата против Заев не придонесуваат за смирување на веќе високата тензија помеѓу политичките партии, вели Алојз Петерле, словенечки пратеник во Европскиот парламент (ЕП) кој е ко-претседател на Заедничкиот комитет за соработка помеѓу македонското Собрание и ЕП. Петерле и припаѓа на Европската народна партија (ЕНП) на која и припаѓа и ВМРО-ДПМНЕ, која е само набљудувач во оваа политичка група бидејќи Македонија се уште не е земја членка на ЕУ.
“Обвиненијата против г-дин Зоран Заев, лидер на опозицискиот Социјал-демократски сојуз, дека тој го нарушува уставниот поредок во Македонија, не се во корист на брзо смирување на веќе високите тензии помеѓу политичките партии”, вели Петерле во својата реакција.
Инаку Петерле беше првиот премиер во првата демократска влада на Словенија по независноста.
Тој изразува надеж дека “за доброто на демократијата, се надевам дека тензиите ќе се намалат и дека ќе се најде договор помеѓу лидерите на партиите на политичко ниво за да може националниот парламент да биде целосно репрезентативен и целосно функционален”.
Во однос на обвинувањата против Заев, Петерле загрижено бара од сите актери во Македонија да разберат дека партијата и државата се две различни работи и дека тоа мора да се почитува исто како и независна судска постапка.
“Во врска со неодамнешните обвинувања против лидерот на опозицијата, барам од сите актери во Македонија да ја почитуваат сепарацијата на демократската власт и институциите, истрагата мора да се одвива преку судството на јасен, независен и транспарентен начин како и да се воспостави јасна сепарација помеѓу партијата и државата. Од огромно значење за кредибилитетот на Македонија е целосно почитување на правната држава, особено во овој високо чувствителен политички случај”, вели Петерле.
Од оваа сестринска партија на ВМРО-ДПМНЕ во ЕП досега ја слушнавме и загрижената реакција на европратеникот Едвард Кукан, поранешен министер за надворешни работи на Словачка. Самата политичката група на ЕНП во Европската унија досега не реагирала.
Според изворите на НОВА во Брисел, партијата внимателно и загрижено ги следи настаните и смета дека е добро да почека, пред да реагира, на посетата на комесарот задолжен за Македонија Австриецот Јоханес Хан идната недела.