На социјалните мрежи се појави повик до студентите и до другите граѓани да ја потпишат петицијата „Архитектонски факултет да го одбрани Скопје“. Се повикуваат професорите од Архитектонските факултети и угледните автори, јавно да побараат стопирање на Скопје 2014, доколку не се стопира проектот, да се излезе на протести и да се прекине наставата на факултетите. Во петицијата меѓу другото пишува:
„Се повикуваат професорите на Архитектонскиот Факултет, организирано да излезат во јавноста и да престанат да се кријат зад катедрите, да го одбранат тоа што остана од Скопје. Интелегенцијата не треба да чека покана, треба да иницира и да делува во општеството. Вистината што никој не ја дознал исто како да не постои. Застанете во одбрана на Скопје!“- се вели во јавниот повик.
За оваа иницијатива се бара поддршка од студентите на Архитектонскиот Факултет при УКИМ, од Архитектонскиот Факултет при Американ Колеџ, од професорите вработени на овие факултети, потоа од Градежниот Факултет, од Асоцијацијата на Архитекти на Македонија и на Град Скопје од архитектите, од Факултетот за ликовни уметности и од реномираните ликовни уметници.
Се повикауваат овие здруженија и истакнати автори да се појават во јавноста, да организираат трибини, да зборуваат јавно за грешките во проектот „Скопје 2014“, да и’ објаснат на македонската јавност со разбирлив јазик што се случува со градот, да побараат јавни дебати и средби со градските власти и владата на Р. Македонија.
Понатаму , во повикот веќе е предвидено дека јавните дебати нема да вродат со плод, па професорите и угледните автори се повикуваат на протести.
„Откако јавноста недвосмислено и без сомнежи ќе увиди дека сите нормални реакции и акции не вродуваат со плод, да се организира протест на интелегенцијата, во кои сите гореспоменати /особено професорите/ ќе излезат и ќе се стават во прв ред, наместо студентското топовско месо, протест кој ќе се повторува во интервали, и кој на вистински, културен, и начин како што доликува ќе се обиде да докаже на тврдоглавите власти дека проектот треба да застане.
Доколку не успее ова, да се заканат факултетите со прекин на наставата, се до прекин на проектот….
Се уште може да се спасат архитектонските симболи на Скопје и да се прекине развојот на оваа ужасна квази архитектура!“, пишува во повикот за потпишување на петицијата „Застанете во одбрана на Скопје!“