Вчерашниот инцидент во Тетово меѓу полицијата и учесници на протестот за поддршка на жртвите во пожарот на модуларната болница, резултира со пет приведени лица. Тие се соочија и со кривични пријави под сомнение за „учество во толпа што ќе спречи службено лице во вршење на службено дејствие“, а тројца од нив се сомничат и за делото „напад на службено лице во вршење на работи за безбедноста“.
Приведените и против кои има кривични пријави се: 31-годишник од кичевско Туин, 52-годишник од Мала Речица, 33-годишник од тетовско Вешала и двајца тетовци на возраст од 33 и 30 години.
Судирот со полицијата се случи во момент кога демонстрантите се упатија кон седиштето на Демократската Унија за интеграција во Мала Речица, при што беа спречени да влезат во објектот.
За насилството, ДУИ ја обвини Алијанса на Албанците, додека оттаму возвратија дека ДУИ е извор на злото.
Пожарот во модуларната болница, предмет на партиски „препукувања“ денеска меѓу ВМРО-ДПМНЕ и СДСМ.