Петмина доктори специјалисти од Општата болница во Велес подготвени се да дадат колективен отказ поради лошите услови за работа и самоволието на директорот Атанас Василев потврдија за НОВА дел од лекарите. Станува збор за двајца ортопеди, двајца уролози и еден хирург кој е и заменик градоначалник во Велес, од актуелната власт.
Со овој колективен чин на давање отказ, по што планираат да се пријават во агенцијата за вработување сакаат да укажат дека е невозможно да работат во постечките услови. Во болницата работат девет специјалисти, а повеќе од половина се подготвени да заминат.. Своите откази веќе ги понудиле пред заменик министерот за здравство Јовица Андоновски.
Тие велат дека во болницата немаат апарати со кои треба да работат бидејќи неопходната апаратура е стара и амортизирана и е надвор од употреба. Меѓу докторите е и урологот Димитар Стровјаноски кој деновиве преку социјалните мрежи му напиша писмо на министерот Тодоров, во кое вели дека не е „подготвен да се построи во неговиот строј“. Писмото наиде на голем одек во јавноста.
Стровјаноски за НОВА вели дека во болницата се случуваат небулози кои се на штетата и на лекарите и на пациентите.
-Еден од примерите е затварањето на операционата сала за ОРЛ, која беше донација од Норвешката влада, за во таа просторија да се смести администрацијата. Сега очно и ушно се во иста оперциона сала, а за поголеми зафати ја користиме салата на хирургија. Замислете какви последици може да има тоа за пациентите, разни инструменти на исто место изјави за НОВА, Стровјаноски.
Во болницата не се исплаќа дополнителната дејност, а најново е обидот на директорот да не исплаќа за сменска работа и за дежурства на медицинските тимови. Но, една од небулозите е и тоа што за претседател на Комисија за утврдување на смрт, е назначена медицинска сестра објаснува Стровјански.
Лекарите од велешката болница укажуваат дека со новиот систем на работа неможат да ги лекуваат пациентите. Тие велат дека за 15 минути колку што се предвидени за преглед преку „Мој термин“ неможат да му посветат доволно внимание на пациентот.
-Се е со закажување и се чека, на пример за ехо може да се чека два месеца, за биопсија уште толку, така што дијагнозата ја поставуваме дури после четири месеци, а болеста напредувала за тоа време вели Стровјаноски.
Тој и на веб страната на Владата го запраша премиерот дали би се согласиле лекари од САД да дојдат во болницата во Велес и да оперираат со постоечката опрема, но американски граѓани. За својот јавно искажан револт тој вели дека имал доста реперкусии. Стровјаноски најави дека е подготвен да си замине на работа во странство, каде уролзите се многу барани отколку да работи во вакви услови и покрај неговата лоша здравствена состојба, со четирите стента на коронарните артерии.
Неофицијално, директорот Василев во понеделник треба да биде викнат на разговор во Министерството за здравство, кога ќе се дознаат и повеќе детали за овој случај.
Инаку, во Велес се случува масовен одлив на медицински кадар во западно- европските земји, Германија, Австрија, а сега најново и во Данска. Само во последната година на работа во некоја од овие земји заминале 16-17 лекари од овој град.