Властите во главниот град на Северна Кореја Пјонгјанг наредија петдневен карантин поради зголемување на случаите на неодредено респираторно заболување, објави јужнокорејскиот медиум NK News, цитирајќи владино соопштение.
Во соопштението на севернокорејската влада не се споменува Ковид-19, но се вели дека жителите на главниот град се замолени да останат во своите домови до крајот на неделата и мора да достават податоци за температурата на телото неколку пати на ден, според NK News, кој ја надгледува Северна Кореја.
NK News вчера објави дека жителите на Пјонгјанг складираат потребни продукти во очекување на построги мерки. Не е познато дали другите области во земјата воведоа нови мерки.
Северна Кореја го објави својот прв случај на Ковид минатата година, но до август веќе прогласи победа над вирусот.
Тајната земја никогаш не објави колку луѓе всушност се заразиле со вирусот, очигледно затоа што нема средства за масовно тестирање, според Ројтерс.
Наместо тоа, го објави дневниот број на случаи на заболени од треска, кој се искачи на 4,77 милиони во земјата со околу 25 милиони луѓе. Но, од 29 јули досега нема објавено ниту еден таков случај.
Државните медиуми продолжија да известуваат за мерките против пандемијата за борба против респираторните заболувања, вклучително и грипот, но досега не ја објавија наредбата за останување дома.
Државната новинска агенција КЦНА вчера соопшти дека градот Каесонг, недалеку од границата со Јужна Кореја, ја интензивирал јавната кампања „за сите вработени доброволно да се придржуваат кон антиепидемиските прописи на работа и во секојдневниот живот“.