Јавно писмо од стручниот тим од архелошкиот локалитет Плаошник, во кое се вели дека Паско Кузман е пример на помладата генерација археолози, човек кој претставува пример за максимална посветеност и ангажираност во заштитата на културното наследство.
„Притворањето на Паско Кузман, многумина од нас, археолозите, го доживеаа како голем личен пораз. Нема да се впуштаме во коментирање на официјални полициски извештаи, а уште помалку, на „сѐнешто приказните“ на интернет.
Во сета оваа ситуација многу, многу нѐ загрижува силното омаловажување на човекот кој најмногу од сите нас се дал во својата професија, да не прескокнеме, и во својата татковина. На човекот кој нам, на помладата генерација археолози, ни претставува пример за целосна, максимална посветеност и ангажираност во заштитата на културното наследство. Да сме до сосем искрени и на чисто, зборуваме за човекот со кого отсекогаш и професионално сме се поистоветувале.
Од тие причини, за нас, стотината што работевме на локалитетот Плаошник, ова претставува силен удар. Ви се чини ли дека можат да се издржат 6 пеколни летни саати без сенка, на 40 целзиусови степени, пикнат во земјена сонда, со длабочина од 3 метри? Ви се чини ли, дека после ова, такво нешто ќе има смисла? Ќе има смисла да се прекршиме од работа, повторно?
И покрај тоа што оваа реакција е видливо субјективна, а оттука можеби и нема да биде значајна за многумина, ние реагираме како негова археолошка екипа, како луѓе коишто со денови, месеци, и ако сакате, со години, поминувале огромна количина време со Паско Кузман, истражувајќи го Плаошник.
Ние од Паско научивме како да се третирааат археолошките предмети. Како да се вадат од земја, како да се води теренска докуменатација, како и каде да се чуваат откако ќе се извадат. Како да се сакаат. Понекогаш се лутевме заради неговата, до претерани граници, организираност, прецизност, уредност и внимателност во работењето. Паско ќе ви каже сѐ ако го прашате, ерудитно ќе го споделува со вас сето свое огромно знаење и искуство, без задршка ќе ви ги покаже сите книги и статии, буквално секогаш простум на располагање кога се работело за научно проучување на охридските археолошки наоди….
>>Археолозите: Многу невистини беа кажани за Паско Кузман
Од него научивме што е професионална етика, беспрекорна.
Од него научивме и како се сака својата земја, топло и човечки, без резерва.
Од него научивме како се почитуваат колеги. Тој нѐ научи дека без тим, нема работа.
Ни велат дека таков бил и деновиве, дома му. Додека сите ние околу него се однесуваме како тазе исфрлени од поплава, безволни и разочарани од ова шупливо и шугаво време…тој си ја пишувал книгата за луксузните археолошки предмети откриени во Лихнитида.
Паско не може да оди никаде.
Ама не заради тоа што во моментов не може да излегува од дома, туку затоа што ѝ е потребен на македонската археологија, затоа што има да заврши уште многу своја интелектуална, творечка работа, и затоа што, освен на своето семејство, потребен ни е и нам.