Бугарската лична карта на Данела Арсовска сепак е валидна, покажа проверката на сајтот Плусинфо на бугарското МВР кое спроведе барање за валидност на личниот документ под број 646948927.
Станува збор за бројот од личната карта на кандидатката за градоначалник на Град Скопје, Данела Арсовска, издадена наводно од Република Бугарија, чија фотографија денеска ја презентираше СДСМ.
Барањето покажа дека личниот документ под наведениот број, сепак, е валиден.
Претходно, бугарскиот портал „24 часа“ објави дека податоците на Данела Арсовска не фигурираат во системот, односно дека името и презимето на кандидатката за градоначалник на Скопје се разликува со една буква од Даниела Арсовска и дека станува збор за различен човек.
Бугарскиот медиум наведува дека Арсовска нема бугарски пасош и бугарска лична карта и посочува дека нејзината адреса во Петрич за која обвини СДСМ е непостоечка.
Претходно и самата Арсовска ги демантираше овие тврдења и најави тужби.
– Треба да се срамат од тоа што го прават и јас веќе пуштив една тужба и сè останато исто така, меѓутоа овојпат нема да биде без надомест, сега тужбата ќе оди со надомест и ќе ги донирам сите средства што ќе ги земам од сите овие безумни лаги од овие изминати неколку дена – рече Арсовска.