Американскиот претседател Доналд Трамп најави дека ќе воведе нова глобална царина од 10 отсто, по одлуката на Врховниот суд денеска да поништи голем дел од неговите првични царини, објави „Политико“.
Трамп на прес-конференција изјави дека ќе задржи дел од постојните царини и дека новите давачки ќе ги воведе врз основа на друг закон. Врховниот суд, со одлука 6-3, ја отфрли надлежноста на администрацијата да воведува царини врз основа на Законот за меѓународни вонредни економски овластувања.
Со оваа најава се настојува да се заобиколи одлуката на судот и да се задржат царинските политики на Трамп.
Со моментално дејство, сите царини за национална безбедност по Член 232, како и постојните царини по Член 301, тие постојат, тие се таму, остануваат на сила, целосно и без исклучок. Денеска ќе потпишам наредба за воведување глобална царина од 10 отсто според Член 122, покрај редовните царини што веќе се наплатуваат. Исто така, започнуваме неколку постапки според Член 301 и други истраги, за да ја заштитиме нашата земја од нефер трговски практики на други држави и компании, изјави Трамп.
Иако според Член 122 Трамп можел да оди и до 15 отсто, овој потег ќе му овозможи повторно да воведе широка глобална основна царина во период од 150 дена. За продолжување по тој рок би била потребна одлука на Конгресот.
На краток рок, тоа ќе му овозможи на претседателот барем привремено да врати дел од царините што Врховниот суд ги поништи. Трамп во петокот изјави дека верува оти новите царини ќе стапат во сила за три дена.
Сепак, ова нема да му даде флексибилност на Трамп каква што имаше со користење на законот за вонредни овластувања. Според законот, царината мора да биде „недискриминаторска“, што значи дека САД не смеат да им даваат олеснувања на одредени трговски партнери, а на други не.
Во подготвени забелешки за говор во Далас, министерот за финансии Скот Бесент наведе дека царините воведени според Член 122, во комбинација со дополнителните царини според Член 232 и Член 301, „ќе резултираат со речиси непроменети царински приходи во 2026 година“.
Трамп најави и започнување истраги за трговските практики на конкретни држави, иако не прецизираше кои, што ќе му овозможи да воведе повисоки царини кон трговски партнери како Јапонија, Европската Унија и Канада. Тој рече дека истрагите ќе траат неколку месеци.
Во меѓувреме, Трамп задржа низа царини за одредени индустрии, вклучувајќи автомобили и автоделови, челик и алуминиум, бакар и дрвена граѓа. Овие царини беа значаен фактор што ги туркаше земјите кон трговски договори и може да играат улога во нивното одржување.
Имаме многу алатки на располагање, изјави американскиот трговски претставник Џејмисон Грир. „Во наредните денови и недели ќе видите како сето тоа се применува. И ќе обезбедиме континуитет на програмата“.