По примерот на неговиот претходник Фатмир Бесими и сегашниот министер за одбрана, Талат Џафери, не ја исклучува можноста на 14 август да го посети споменикот на ОНА во Слупчане.
Според Џафери посетата на Слупчане е дел од неговите дневни активности.
„Јас како министер сум претставник на сите граѓани и не е исклучена и таа можност и не гледам причина зошто да не“, кратко изјави Џафери.
На прашањето дали посетата ќе биде официјална како министер за одбрана или во друг формат, Џафери одговори:
„Ако има официјален и неофицијален министер тогаш може да го третирате како што сакате“.
Официјалното полагање на цвеќе на споменикот на ОНА од страна на Министерството за одбрана на чело со тогашниот министер Бесими минатата година предизвика бурни реакции во јавноста, но и од Валадата која ден потоа се огради од одбележувањето со објаснување дека за тоа не била донесена официјална одлука, ниту испратила владина делегација. Од одбележувањето се огради Генералштабот на АРМ.