Бизнисменот Сеад Кочан кој е правосилно осуден на затворска казна од 4 години и 8 месеци за случајот „Труст“ вечерва е спроведен во затворот во Идризово. Од МВР за НОВА потврдија дека постапувале по судска наредба и Кочан е префрлен во затвор на издржување на казната.
Наредбата до МВР за неговото приведување е пуштена доцна вечерва откако надлежниот судија за извршување санкции попладнево го одбил и неговото трето барање за одложување на издржување на казната.
„По добивање на целокупната документација поврзана со новото барање за одлагање со отпочнување со издржување на затворската казна на еден од обвинетите во предметот со К.бр. 1459/17 од обвинителството значен како „Труст“, судија за извршување санкции донесе решение со кое го отфрли барањето како недозволено и издаде наредба осуденото лице со полициска придружба веднаш да биде спроведено во надлежната Казнено поправна установа“.
Кочан беше сместен во приватна болница, и Судот пред да ја донесе одлуката побара документација од болницата за здравствената состојба на осудениот бизнисмен.
Кочан два пати поднесе барање за одложување на затворската казна – поради неодложни обврски и здравствени проблеми, но Судот го одби.
Затворската казна која треба да ја одлежи бизнисменот е поради манипулации за добивање тендер од ЕЛЕМ од 17 милиони евра со прикажување лажна документација. Кочан, кој е единствениот од овој предмет кој треба да одлежи затворска казна од 4 години и 8 месеци затвор, откако Апелација во март годинава му ја намали првостепената казна од 6 години на која беше осуден за злоупотреба на јавна набавка во јули 2018.