По повод чествувањето на 18-ти август Денот на АРМ, денеска на Градските гробишта во Бутел, во Скопје, се одржа церемонија со полагање венци и цвеќе со воени почести на партизанските гробишта, на гробот на загинатиот претседател Борис Трајковски, поранешниот претседател Киро Клигоров, како и на гробот на генерал Михаило Апостолски.
Делегацијата од ГШ на АРМ е предводена од Началникот на ГШ на АРМ генерал-мајор Горанчо Котески, а присутни се делегации на кабинетите на Претседателот, Собранието на Република Македонија, Владата, Министерството за одбрана, Сојузот на борците од НОВ, семејствата на поранешните претседатели на Република Македонија, на Сојузот на резервните воени стрешини на Република Македонија, и други.
Централната свеченост по повод роденденот на АРМ, ќе се одржи вечерва пред зградата на МО и ГШ на АРМ, на која ќе се обратат претседателот на Република Македонија и врховен командант Ѓорге Иванов и министерот за одбрана Талат Џафери.
На свеченоста ќе присуствуваат: претседателот на Собранието Трајко Вељаноски, началникот на ГШ на АРМ генерал-мајор Горанчо Котески, министри во Владата, пратеници во Собранието, поранешни министри за одбрана и началници на ГШ на АРМ, пензионирани генерали на АРМ, високи гости од повеќе институции во Република Македонија, амбасадорите и воените аташеа акредитирани во Република Македонија и други.
По завршување на свеченоста, во чест на Денот на АРМ, од касарната „Илинден“ ќе се изврши почесна стрелба со испалување 10 плотуни од 12 артилериски орудија.