Актерот и актуелен директор на Драмскиот театар во Скопје, Бранко Ѓорчев после долго боледување синоќа ја изгуби битката со ракот.
Погребот ќе биде извршен утре во 14 часот на Градските гробишта Бутел. Претходно, во 11 часот, Драмскиот театар-Скопје ќе одржи комеморација по повод смртта на Бранко Ѓорчев.
Бранко Ѓорчев е роден 1962 година, а во 1986 година дипломира на Факултет за драмски уметности, Универзитет „Кирил и Методиј“ Скопје, во класата на Проф. Вукан Диневски.
Од 1987 година работи како актер во Драмски Театар Скопје. Имаше остварено бројни главни и споредни улоги во врвни домашни претстави во матичниот театар и во сите театарски институции во државата.
Во 2006 година беше избран за директор на Националната установа Драмски театар, а во 2010 реизбран на оваа фунција.
Во ноември минатата година Ѓорчев ја доби државната награда „Св.Климент Охридски“ за 2012 година, која се доделува за долгогодишни остварувања во областа на воспитанието, образованието, културата, уметноста, здравството, спортот, заштитата и унапредувањето на човековата околина и во социјалната дејност од јавен интерес на Република Македонија.