Поранешната ѕвезда на германскиот фудбал, „кралот“ на головите, Герд Милер почина во 75-та година од животот. Легендата се мачеше и со Алцхајмерова болест, а трагичната вест утрово ја растажи и Германија, но и светскиот фудбал. Милер беше еден од најистакнатите Германци во историјата, остави огромна трага во Бундеслигата и со настапите за репрезентацијата. Повозрасните велат „таков голгетер нема веќе да се роди “, пренесуваат спортските портали и агенциите.
– Денеска е тажен ден, црн ден за Баерн и за сите фанови. Герд Милер беше најдобриот напаѓач кој некогаш играл, човек, личност во светскиот фудбал. Без него, Баерн не би бил ваков клуб. Ќе останат неговото име и сеќавање на него засекогаш – рече претседателот на Баерн, Хуберт Хајнер.
За Баерн Минхен на 607 натпревари Милер постигна неверојатни 566 голови, од кои 365 во Бундес-лигата. Тој беше стрелецот на победничкиот гол во финалето на СП во Минхен 1974 против Холандија.
Во летото 1964 дојде во Баерн Минхен. Иконата на Германија беше светски првак во 1974 година, еднаш европски првак во 1972 со репрезентацијата.
За репрезентацијата на Германија одигра 62 натпревари и постигна 68 голови.