Легендарниот хрватски кантавтор, писател, поет и преведувач Арсен Дедиќ почина денеска во 78-та година од животот.
Арсен Дедиќ починал во болницата КБЦ во Загреб, откако му откажале органите поради сепса и гангрена на цревата. Пред две недели тој бил примен поради сепса на интензивна нега, откако претходно му била вградена протеза за вештачки колк.
На култниот музичар пред десеттина години му беше пресаден црн дроб, поради што бил повеќе изложен на инфекции. Состојбата му се влошила во петокот.
Дедиќ е роден 1938-ма година во Шибеник, а освен како композитирот, беше познат и како диригент, книжевник и преведувач. Во својата плодна кариера освои бројни награди на разни фестивали, добитник е на две награди Златна арена, за филмска музика, одликуван е со заслуги за допринос во културата, како и многу други значајни награди.
Зад себе ја остави сопругата Габи Новак, ќерката Сандра и синот Матија и големо творештво во областа на музиката.